Ondersoek of jy Weergebore is: Deel Een
Deur Marius Wolfaardt
2 Korinthiërs 13:5
“Ondersoek julself of julle in die geloof is; stel julself op die proef. Of is julle nie seker van julself dat Jesus Christus in julle is nie—as julle ten minste nie verwerplik is nie!”
Die Woord sê: “Ondersoek julself of julle in die geloof is; stel julself op die proef.”
Hierdie is twee besonderse opdragte:
1. Ondersoek
Dis om te “examine”, eksamen te skryf (evalueer dit wat jy geleer het van jou geloof) en ‘n noukeurige navorsing (volgens die HAT).
2. Stel op die Proef
Om iets te toets, om te sien of dit waardig is om aan te neem. Wat moet getoets word? Ons moet getoets word.
3. In die geloof is
Geloof gaan ‘n invloed hê op jou verlede, hede en toekoms.
Hierdie opdrag is ‘n uitdaging aan ons. Draai die vergrootglas van die Woord op jou geloof en kyk of dit nog in Jesus Christus is. Kyk of jou geloor dalk nie miskien valse fondamente het nie. Is jy seker dat jy ‘n kind van die Here is en dat jy weergebore is?
Johannes 3:3
“Voorwaar, voorwaar Ek sê vir jou, as iemand nie weer gebore word nie, kan hy die koninkryk van God nie sien nie.”
Defenisie van Wedergeboorte
Wedergeboorte kommunikeer die boodskap van die lewe, deur die Heilige Gees, aan die siel wat dood is in sy oortredinge en sondes. Wedergeboorte dui op die opstandingslewe van die Here Jesus. Op grond van Sy kruisdood moet ons van sonde verlos word en daarvoor sterwe, en terselfdetyd lewend gemaak word in Hom sodat ons Sy opstandingslewe kan verkry. Hy vergewe dus nie net jou sondes nie, maar maak ook van jou ‘n nuwe mens.
Jesus Christus, die Vleesgeworde Woord, moet so geleerken word, dat die onontbeerlike belofte oor die Wedergeboorte in die geloof aanvaar kan word. Wedergeboorte is ‘n morele verandering aangebring in die hart van die mens deur die Heilige Gees.
Onthou, daar moet besef word dat die Vyand nooit die stryd gewonne sal gee nie! Daar is talle valse fondamente wat hy aan mense bied, wanneer hulle na die Here of die krag van die Heilige Gees soek. Sy eerste doelwit is om die persoon daarvan te weerhou om deur te gaan met die Here en Weergebore te word.
7 kenmerke wat Nie Bewys dat ek Reddende Geloof Besit nie
Mense roem so vinnid in hierdie 7 dinge, maar hulle bewys nie dat jy weergebore is nie. Ondersoek jouself, of jy nie miskien mislei is en oppad is na ‘n Ewige hel nie.
1. Sigbare Moraliteit/ Sedes (Morally good)
Somige mense, is net eenvoudig goeie mense. Hulle is eerlik, openhartig, betroubaar, dankbaar, liefdevol en het uiterlik ‘goeie sedes’.
Lukas 18:20-21
“Jy ken die gebooie: Jy mag nie egbreek nie; jy mag nie doodslaan nie; jy mag nie steel nie; jy mag geen valse getuienis gee nie; eer jou vader en jou moeder. En hy sê: Al hierdie dinge het ek onderhou van my jeug af.”
Dis wat ek bedoel met sigbare moraliteit, maar dit beteken nie dat hy tot geloof in Jesus Christus gekom het nie. Die ryk jongman is sigbaar volmaak, maar hy wou nie met sy boesem sonde breek nie en het bedroef weg van die Here af gegaan. Die gesegte sê: “People can clean up their act.” Met ander woorde, hulle kan ‘n nuwe blaadjie omslaan, maar hulle doen dit deur ‘self verbetering’ in plaas van wedergeboorte.
Uiterlik kan u ‘n goeie lewe handhaaf: meer Bybel lees en probeer bid, meer kerk toe gaan, meer aandag aan jou gesin gee, meer liefdadigheidswerk doen. Maar, dit beteken nie dat u reddende geloof besit nie.
2. Intellektuele Kennis (Knowledge)
Kennis is nodig vir redding, waar sigbare moraliteit die vrug van geloof in Christus kan wees, maar nie een van hulle is gelykstaande aan reddende geloof nie. Om net kennis oor Jesus Christus te hê, gaan jou verseker nie red nie! Jy kan weet wie Jesus Christus is, selfs wat Hy gedoen het. Jy kan weet dat Hy aan die kruis gesterf het, opgestaan het en dat hy weer gaan kom op die Wolke. Maar, jy kan nogsteeds jou hart verhard en jou rug op Hom draai.
Hebreërs 10:26
“Want as ons opsetlik sondig, nadat ons die kennis van die waarheid ontvang het, bly daar geen offer vir die sondes meer oor nie,”
3. Godsdienstige betrokkenheid (Active in ‘Christian work’)
2 Timótheüs 3:5
“mense wat ‘n gedaante van godsaligheid het, maar die krag daarvan verloën het. Keer jou ook van hierdie mense af.”
Jy kan betrokke wees by gemeenskaplike en kerklike aktiwiteite en byeenkomste bywoon. Maar dis alles net om mense te beïndruk. Die Krag van God is nie in jou lewe nie, daarom moet daar voorgegee word. Wees versigtig, moenie dink omdat jy jou hele lewe in die kerk was (sondagskool, diaken in die kerk, kerk basaars) dat jy ‘n reddende geloof besit nie, maar in teendeel vormgodsdienstigheid.
Nikodemus, moes duidelik verstaan dat dit nie net ‘n mooi lewe en teologiese kennis gaan kos nie, maar wedergeboorte.
4. Aktiewe Bediening (Active Ministries)
Bileam was ‘n profeet, maar geld was vir hom belangriker, hy het geld liewer gehad as God.
Saul, het ywerig Christene vervolg. Hy het by Stefanus se steniging hulle klere opgepas.
Judas Iskariot, was een van die twaalf dissipels.
Matthéüs 7:22-23
“Baie sal in daardie dag vir My sê: Here, Here, het ons nie in u Naam geprofeteer en in u Naam duiwels uitgedrywe en in u Naam baie kragte gedoen nie? En dan sal Ek aan hulle sê: Ek het julle nooit geken nie. Gaan weg van My, julle wat die ongeregtigheid werk!”
Pasop! ‘n Begaafde prediker is nie ‘n bewys van reddende geloof nie.
5. Sonde-oortuiging (Conviction of Sin)
Baie mense voel sleg oor hul sonde! Baie het skuldgevoelens, maar dit bly ‘n gevoel, môre is dit weg of word verplaas. Kyk maar by sielkundiges, wat is een van die redes hoekom mense na hulle toe gaan? ‘n Skuldgevoel! In die tye waarin ons lewe, word dit verkeerdelik behandel deur skuldverplasing.
i.) Sielkunde sê:
Deur my selfbeeld op te bou, sal dit gehelp word. Die posisie waarin ek is, is nie my skuld nie. Skuldverplasing: dis altyd iemand anders se skuld vir my sondes en optredes.
ii.) Nuwe Teologie sê:
Dis deur bloedlynvloeke dat hierde sonde in my lewe is. Dis weereens skuldverplasing, want dis my voorouers se skuld. Jy wil nooit jouself blameer vir jou sondes nie. Dieselfde het in die Bybel gebeur in die tuin van Eden: Adam het die skuld op God gepak en Eva het die slang blameer!
Daar’s net een oplossing vir skuldgevoel: die Evangelie (berou, bely, bekeer). As jy werklik onder ‘n sonde oortuiging kom, sal jy iets daaromtrent doen.
Handelinge 3:19
“Kom dan tot inkeer (met berou en ‘n veranderde gevoel oor julle sondes) en bekeer julle (draai om), sodat julle sondes uitgewis kan word.”
Droefheid en berou oor sonde is egter ‘n direkte resultaat van die Heilige Gees se oortuiging van sonde in jou hart! Dit dryf jou na die Here en bewerk ‘n bekering, nie net van sonde nie, maar ‘n bekering tot God.
6. Versekering (Insurance)
“Ek moet ‘n Christen wees, want ek voel soos een!” Satan se hele doel is om mense te laat voel in plaas van om te glo. “Hulle voel en is nie regtig Christene nie.” Baie mense voel nie skuldig nie. Dit kan wees dat jou gewete net stomp is. Ander voel goed oor hulself, maar hulle harte kan net hard wees. Maar, hierdie dinge beteken nie noodwendig dat jy tot reddende geloof gekom het nie.
7. ‘n Tyd van besluitneming (a Time of Decisions)
Ek het by ‘n diens uitgekom en saam met iemand gebid en daarom weet ek, ek is ‘n Christen. Ek het toe ek so en so oud was my hartjie vir liewe Jesus gegee, daarom weet ek, ek is ‘n Christen.
Iemand het gesê: “Nobody’s Salvation is verified by the Past.”
Dit gaan oor hoe ek nou leef, hoe ek nou Jesus Christus vandag beleef. Ek stem saam dat daar ‘n dag en ‘n datum moet wees. Net so seker soos jy is of weet jy is gebore, net so seker moet jy wees jy is weergebore.
Leef jy dit uit? Is dit sigbaar vir jou vriende en vyande? Is jy ‘n nuwe skepsel in Christus, het al die ou dinge verbygegaan? Is jy gehoorsaam aan die Woord? Word jy verander, vernuwe na die beeld van Christus?
Of lewe jy nog met bewustelike sonde? Hoekom roem jy dan in ‘n datum, maar vandag verloën jy Christus?
Was jy nou eerlik met jouself gewees? Het jy jouself ondersoek en jouself op die proef gestel? Onthou, Hierdie 7 kenmerke wat jy miskien het, bewys nie dat jy weergebore is nie.
Johannes 8:44b
“Hy was ‘n mensemoordenaar van die begin af en staan nie in die waarheid nie, omdat daar in hom geen waarheid is nie.”
Die Satan wil u op ‘n dwaalweg hou, hy wil weerhou dat jy weergebore word.
Lukas 13:24
“Stry hard om in te gaan deur die nou poort, want baie, sê Ek vir julle, sal probeer om in te gaan en sal nie in staat wees nie.”
As die Here vandag u roep tot bekering en u besef u verlore toestand en u besef die enigste oplossing is Jesus Christus en dat u iets dringends aan u saak moet doen…
Gee gehoor aan Sy roepstem, dis ‘n wilsbesluit.
Openbaring 22:17
“Kom! En laat hom wat hoor, sê: Kom! En laat hom wat dors het, kom; en laat hom wat wil, die water van die lewe neem, verniet.”
Spreuke 28:13
“Hy wat sy oortredinge bedek, sal nie voorspoedig wees nie; maar hy wat dit bely en laat staan, sal barmhartigheid vind.”
Soortgelyke artikels: