Die Bybel in Geheel

Inleiding

Hierdie is 'n kort oorsig om vir jou 'n duideliker prentjie te skets voordat jy in diepte met Bybelstudie begin. Die Bybel in Geheel studie, is 'n studie van die hele Bybel. Dit neem jou deur elke boek van die Bybel om vir jou 'n kort oorsig te gee oor elke boek, deur wie dit geskryf was en waarom dit geskryf was en lig ook dan belangrike dele uit en som die boek in kort op. Met hierdie notas saam sal verdere studies van die Bybel baie meer vir jou sin maak en help om sekere konsepte beter te verstaan.

Die waarde van die Bybel

• Dit is die unieke woord van God.Dit bevat die gedagtes van God, die staat van die mens, die weg na saligheid en die uiteinde van sondaars.Ook lig om ons te lei, voedsel om ons te ondersteun en bemoediging om ons te troos.
• Die Bybel bestaan uit die Ou en Nuwe Testament, 66 boeke altesaam wat geskryf was deur omtrent 36 God-geïnspireerde mans oor ‘n periode van omtrent 1600 jaar.Al hierdie boeke pas in mekaar in om een konsekwente storie te vertel, omdat die skrywers deur die Heilige Gees gelei was.
• As dit kom by die Woord weet ons dat God dinge weet wat ons nie totaal kan begryp nie, maar ons moet glo watokal God sê al kan ons dit nie ten volle verstaan nie.

Deut 29:29  “Die verborge dinge is vir die HERE onse God; maar die geopenbaarde dinge is vir ons en ons kinders tot in ewigheid, om te doen al die woorde van hierdie wet.”

Jes 55:8-9 “Want my gedagtes is nie julle gedagtes nie, en julle weë is nie my weë nie, spreek die HERE. Want soos die hemel hoër is as die aarde, so is my weë hoër as julle weë en my gedagtes as julle gedagtes.”

Om die Bybel te verstaan

• Een van die belangrikste sleutels om die Bybel te verstaan is gehoorsaamheid.

As ons gehoorsaam is aan die lig wat God vir ons gee, sal Hy vir ons meer lig gee. Die mense wat die beste vordering in Bybelstudie maak is diegene wat ‘n rein begeerte het om te doen watookal God sê.

• Dit is ook belangrik om ‘n vers in konteks te verstaan. 1 Kor 8:5 sê dat daar baie gode is. As hierdie vers alleen gelees word kan dit aandui dat daar meer is as net een ware God, maar die res van die hoofstuk sê dat daar baie heidense gode is, maar vir ons net een God (vers 4).

Elke vers moet ook verstaan word in konteks met nie net die hoofstuk en boek waarin dit staan nie, maar ook met die Bybel in geheel. Daar is geen skrif wat ‘n ander een kan weerspreek nie. Een waarheid moet in harmonie wees met  die volle waarheid van die Bybel in geheel. As Jak 2:24 alleen gelees word kan dit lyk of ons deur ons werke gered kan word, maar die res van die Bybel sê dat ons deur genade alleen gered word deur geloof – en dat die werke net die vrug van ons redding is.  Wat Jakobus hier vir ons leer is die belangrikheid van werke as ‘n uiterlike teken van ons geloof.

Bybelse Uitdrukkings

• Daar is baie vergelykings in die Bybel, bv. in Matt 23:24 sê Jesus vir die fariseërs dat hulle kamele insluk. Hier het Jesus ‘n vergelyking gebruik waarin hy oordryf het om ‘n boodskap duidelik oor te bring. Toe Jesus van riviere van lewende water gepraat het in Joh 7:38, het Hy verwys na die Heilige Gees (vers 39). Aangesien ons vergelykings gebruik in ons daaglikse gesprekke het ons gewoonlik nie ‘n probleem om dit raak te sien in die Bybel nie.
• Daar is ook algemene uitsprake in die Bybel wat verstaan moet word, sodat uitsonderings toegelaat kan word. Byvoorbeeld diegene wat hul vader en moeder eer word ‘n lang lewe belowe (Efs 6:2-3).Maar ons weet van seker jong mense wat dit wel gedoen het en tog op ‘n vroë ouderdom gesterf het.Dit is nogsteeds waar dat as ‘n algemene reël gehoorsame kinders langer lewe as wilde en rebelse jong mense.
• Soms praat die Bybel van God wat iets doen, waar Hy dit eintlik net toegelaat het om te gebeur.Ons weet dat God niks slegs of verkeerd kan doen nie, maar ons lees dat ‘n bose gees van die Here’ oor Saul gekom het (1 Sam 19:9).God het dit toegelaat om te gebeur, maar Hy kon dit self nie doen nie.
• Soms praat God van dinge wat verseker gedoen sal word asof dit reeds gedoen is.In Rom 8:30 sê dit dat gelowiges verheerlik is. Ons sal eintlik eers verheerlik word wanneer Jesus kom en ons weg neem na Sy Vader se huis.Maar die waarheid van verheerliking is so seker dat God daarvan praat asof dit reeds so is.Wat ‘n wonderlike ding is dit nie dat die mees goddelose sondaar nie net gered kan word van die ewige dood nie, maar hy kan ook seker wees van die komende glorie asof hy dit alreeds het.
• Daar is ‘n balans van prioriteite in die Bybel.Sommige waarhede word ligtelik aangeraak waar ander onderwerpe beklemtoon word.Ons moet probeer om met ‘n balans na die Bybel te kyk, deur nie een ding uit te lig en op te konsentreer nie, maar om dit in die korrekte plek van belangrikheid te plaas.

Die Bybel – Lees dit om wys te wees, glo dit om gered te word en doen dit om heilig te word.

Laai hierdie studies af in PDF formaat:
1. Die Bybel in Geheel - Inleiding
2. Die Bybel in Geheel - Ou Testament
3. Die Bybel in Geheel - Nuwe Testament

Die Bybel in Geheel - DEEL 1 Die Ou Testament

Die Bybel in Geheel - DEEL 2 Die Nuwe Testament